Netflix desvela o tráiler da segunda tempada de “Clanes” (Vaca Films), que se estreará o 3 de abril

Netflix desvelou o tráiler oficial da segunda tempada de “Clanes”, a exitosa serie protagonizada por Clara Lago e Tamar Novas e producida pola nosa asociada Vaca Films, que se estreará na plataforma o próximo 3 de abril.

Pasaron 3 anos e moitas cousas cambiaron. A pesar dos seus esforzos por deixar atrás o pasado, Ana (Clara Lago) e Daniel (Tamar Novas) volverán verse envoltos no mundo do narcotráfico, e esta vez en bandos opostos. Mentres Daniel acepta saír ao mar por última vez para axudar ao seu pai, Ana deberá volver a Cambados e traballar co Clan inimigo dos Padín. Ana aceptará aínda que é consciente de que isto pode supoñer o final dos Padín e tamén, probablemente, o final da súa relación con Daniel.

Os 6 episodios que dan forma a esta nova entrega da aclamada serie están escritos por Jorge Guerricaechevarría e dirixidos por Marc Vigil e Javier Rodríguez. Ademais, Luís Zahera (“Animal”, “As bestas”) únese aos novos episodios da serie e ao elenco encabezado por Clara Lago (“Ocho apellidos vascos”, “El vecino”) e Tamar Novas (“Rondallas”, “El desorden que dejas”). Completan o reparto Xosé Antonio Touriñán (“Cuñados”), Melania Cruz (“Malencolía”), Miguel de Lira (“Cuñados”), María Pujalte (“Los misterios de Laura”), Chechu Salgado (“Las leyes de la frontera”) e Diego Anido (“La infiltrada”) entre outros.

A primeira tempada de “Clanes” foi a serie de fala non inglesa máis vista en Netflix durante a súa semana de estrea, conseguindo situarse como número 1 en 28 países e alcanzando o Top 10 en 82 países.