Pedralonga Estudios cítase con localizadores e estudios internacionais en Shooting Locations Marketplace 2025

Pedralonga Estudios, o novo hub de produción audiovisual de Galicia, terá unha participación activa en Shooting Locations Marketplace (SLM), cuxa quinta edición celébrase a partir de mañá en Valladolid.

Definido como un mercado de contratación para profesionais da industria das rodaxes, SLM é un foro especializado en conectar a localizadores, destinos, filme commissions e produtoras de service cun sistema de axendas de citas xa preestablecidas. Esta quinta edición, organizada por Feira de Valladolid en colaboración con Spain Film Commission, reunirá a participantes de 24 países que poderán reunirse con preto de 70 localizadores e produtores de majors como Amazon MGM Studios, Sony Pictures Entertainment, CBS Studios, Fremantle, HBO, Marvel Studios, Legendary Entertainment ou Focus Features.

José Manuel Deus, director xeral de Pedralonga Estudos, acudirá a este evento boutique para manter contactos cualificados con localizadores e produtores internacionais, cunha axenda inicial concertada de 24 reunións nas que dará a coñecer as vantaxes de Coruña Estudio Inmersivo (CEI), o estudio virtual con mellor equipamento técnico de España e líder da nova xeración de rodaxes inmersivas en Europa. “A nosa aposta pola produción virtual e as contornas inmersivas reforzan a posición de CEI ante produtores que buscan eficiencia, flexibilidade creativa e optimización de custos loxísticos”, sinalou Deus.

Claves de competitividade: eficiencia de custos, tecnoloxía e sustentabilidade

Na xornada do xoves 16, Alfonso López, responsable de produción e desenvolvemento de negocio en Portocabo (unha das dez compañías galegas que integran o consorcio asociado nos estudios), representará a Pedralonga Estudios como relator do panel internacional ‘Retos para ser competitivos nun mercado global’, onde compartirá escenario con representantes das produtoras de servizos Ready to Shoot (Portugal) e MenuFilmid (Estonia), así como o ente público vasco Film Basque Country. A moderación correrá a cargo de Venia Vergou, manager da European Film Commissions Network (EUFCN).

O debate abordará as claves para que territorios e empresas audiovisuais  reforcen a súa competitividade na captación de producións internacionais, abrindo liñas de reflexión como a integración de tecnoloxía para reducir tempos e custos de rodaxe, estratexias para equilibrar incentivos fiscais, importancia da colaboración público-privada no fortalecemento das infraestruturas de produción, ou factores crave cada vez máis determinantes como a capacidade para xerar un ecosistema sólido con talento local especializado, ou a sustentabilidade tanto ambiental como económica para garantir a competitividade de localizacións e destinos de rodaxe.

A participación de Pedralonga Estudios en SLM é unha oportunidade estratéxica para expoñer as súas vantaxes competitivas, como son a eficiencia de custos (con aforro de ata o 65%), as súas capacidades técnicas e unha visión de futuro innovadora baseada na produción híbrida (virtual e convencional) como proposta de valor para atraer producións internacionais de alcance global. Así, nas súas instalacións realizáronse recentemente rodaxes publicitarias de marcas internacionais, entre as que se atopa grupo Inditex, empresa matriz da firma Pull & Bear, entre outras. Ademais, en breve iniciarase a rodaxe dunha longametraxe orixinal para unha plataforma global, o que posiciona a Pedralonga Estudios como un actor crave na nova xeración de espazos de rodaxe eficientes, sostibles e tecnoloxicamente máis avanzados.