Pepe Coira e “Lume”, premiados no Festival Internacional de Series Ría de Vigo

O Festival Internacional de Series Ría de Vigo pechou onte, domingo, a súa I edición premiando na Gala de Clausura a “Lume”, como mellor serie do público, e a Pepe Coira coa Oliva desta primeira edición, un premio que recoñece o traballo realizado polo guionista lucense.

A gala celebrouse como colofón desta primeira edición que transcorreu durante tres xornadas na Estación Marítima de Vigo, con invitados como Francis Lorenzo, María Vázquez, Cristina Castaño e Isabel Naveira, no marco da estrea de “Lume”, a nova serie para TVG, RTP e Max coproducida pola nosa asociada Setemedia, ademais da directora viguesa Lucía Estévez, que estreou o episodio que dirixe de “Weiss&Morales”.

Na parte de industria acudiron produtoras galegas e do resto do país, o Clúster Audiovisual Galego e BAFTA, entre outros. O Festival contou con máis de 2.000 asistentes provenientes de distintos puntos do territorio nacional.

A celebración foi conducida por Carlos Veleiro e contou con diversas actuacións a cargo de Laura Palomo, Acting School e Media Punta. Ademais, os directores do Festival agradeceron no seu discurso tanto ao público como á industria a gran acollida deste festival, ademais da dos colaborades e patrocinadores que fixeron posible o certame.

Nesta primeira edición, contouse coa TVG, Estrella Galicia e Fundación Luckia como principais patrocinadores do Festival organizado por BB Events Group.