Cluster Audiovisual Galego

Noticias del Clúster

A serie “Vidago Palace”, dispoñible en HBO Portugal

Desde este domingo 31 de maio está dispoñible en HBO Portugal “Vidago Palace”, un drama romántico de seis capítulos producido pola galega e socia do Clúster Portocabo e a portuguesa Hop Filmes. A serie, protagonizada por Micaela Lupu, Pedro Barroso e David Seijo, foi a primeira coprodución galego-portuguesa feita para a Televisión de Galicia e a RTP.

A trama de “Vidago Palace” transcorre nun escenario tan extraordinario como o luxoso hotel e spa aberto en Vidago no século XX para recibir ás máis nobres figuras da sociedade europea. Nun contexto marcado polos Xogos Olímpicos de Berlín, a ditadura de Salazar en Portugal e o inicio da Guerra Civil en España é no que ten lugar a historia de amor de Carlota e Pedro, a filla dos condes de Vimieiro e o fillo dun empregado do hotel. “Vidago Palace” é a historia dunha muller e un home dispostos a enfrontarse a todo tipo de obstáculos para poder
 vivir o seu romance.

Mentres que o portugués Enrique Oliveira foi o responsable da creación e dirección da serie, no guión tamén participaron Pepe Coira e Araceli Gonda, traendo parte da historia á fronteira entre Galicia e Portugal. No elenco atópanse destacadas actrices e actores galegos como David Seijo, Antonio Mourelos, Eva Fernández, David Novas, David Amor, Sheyla Fariña ou Xosé Antonio Touriñán. Alén disto, tamén figuran no equipo recoñecidos profesionais do audiovisual galego como Alfonso Blanco na produción executiva, Ana Míguez na produción, Xavi Font como creador da banda sonora ou Antonio Pereira na dirección de arte.

Protocolo para a prevención fronte o coronavirus no sector audiovisual, elaborado polo ISSGA en colaboración co Clúster Audiovisual Galego

Os profesionais e as empresas do audiovisual galego dispoñen dun Protocolo con medidas de prevención fronte ao coronavirus específicas para o sector. Este documento foi elaborado polo Instituto de Seguridade e Saúde Laboral de Galicia (ISSGA), a solicitude e en colaboración co Clúster Audiovisual Galego, e conta co asesoramento técnico deste organismo dependente da Xunta de Galicia.

Tendo en conta a situación de declaración de estado de alarma en todo o territorio nacional como consecuencia da pandemia provocada pola COVID-19, o ISSGA elabora un documento no que se recollen recomendacións preventivas básicas que se deben ter en conta en todas as fases dunha produción audiovisual e nas rodaxes de contidos audiovisuais, tanto en exteriores coma en interiores, segundo as informacións das autoridades sanitarias sobre o coronavirus.

Este protocolo debe enmarcarse como documento en continua actualización e debe revisarse se se publican recomendacións que afecten ao contido do mesmo polas autoridades sanitarias e as autoridades competentes nesta materia, tanto a nivel nacional como autonómico.

Podes consultar o documento aquí

O proxecto “Oro negro”, de Paula Cons, entre os seleccionados para Iberseries Pitch

“Oro negro”, o proxecto da socia Paula Cons e Agallas Films, é un dos cinco finalistas do Iberseries Pitch, concurso para series en español en desenvolvemento. Os mesmos foron elixidos entre máis de 180 candidaturas e competirán por un premio de 3.000 euros.

O xurado está composto por Ana Celia Urquidi (Hemisphere Media Group), Arantxa Écija (Mediaset España) e Alex Medeiros (Globo).

Ademais do premio, os elixidos terán a oportunidade de presentar as súas propostas ante un público composto por produtores, potenciais financiadores, representantes de plataformas e profesionais clave do sector audiovisual.

Ademais de “Oro negro” (Western. España) de Paula Cons, os outros catro finalistas son: “Cartagenes” (Comedia/drama. Colombia), de Felipe Solarte; “Masa madre” (Documental. Arxentina), de Mercedes Córdova; “Nada” (Thriller. España), de Jorge Dorado, e “Viaje al Antártico” (Animación. España), de Eva Pérez Misa.

“Oro negro”

Mentres o mundo batallaba na 2ª Guerra Mundial e os nazis pagaban o que fora polo wolframio que necesitaban para o seu armamento, na fronteira entre España e Portugal vivíase unha febre do ouro irrepetible. Nun deses lugares sen lei, un inmigrante portugués rebélase contra o seu destino de carne de cañón, e quere liderar o contrabando. O seu problema: non é mala persoa.

“Una obra maestra” (“The Burnt Orange Heresy”) chegará aos cines o 31 de xullo da man de Filmax

Tras clausurar o pasado Festival Internacional de Cine de Venecia e presentarse no noso país dentro do Festival de San Sebastián onde Donald Sutherland recibíu o Premio Donostia, "Una obra maestra" (“The Burnt Orange Heresy”), dirixida polo cineasta italiano Giuseppe Capotondi, chegará aos cines de toda España o próximo 31 de xullo da man de Filmax.

O mundo da arte e as baixas paixóns chocan no elegante e sensual thriller neo-noir protagonizado por Claes Bang (“The Square”, “Millennium: Lo que no te mata te hace más fuerte”), Donald Sutherland (“Los juegos del hambre”, “Cold mountain”), Elizabeth Debicki (“Viudas”, “El gran Gatsby”) e a lenda viva da música, Mick Jagger, que volve á gran pantalla logo dunha longa carreira na que tamén desenvolveu  súa faceta como actor e produtor de cine.

Capotondi, que anteriormente dirixiu “La doppia ora” (2009), asina esta película magnética baseada na novela de Charles Willeford que se asoma aos entresixos do mundo da arte. Unha historia que cuestiona ata onde estamos dispostos a chegar para cumprir a nosa ambición e as mentiras que fabricamos para perseguir os nosos obxectivos.

Con guión de Scott B Smith (“Siberia”, “Un plan sencillo”), unha coidada dirección de arte ambientada nas elegantes paisaxes do Lago Como e con música de Craig Armstrong (“Moulin Rouge”), leva claramente o selo dos seus tres produtores: William Horberg (“El talento de Mr. Ripley”, “Cometas en el cielo”, “Could Mountain”), David Lancaster (“Whiplash”) e David Zander (un dos produtores publicitarios máis laureados do mundo con 9 Palmas de Ouro no Cannes Lions International Festival of Creativity e cuxa traxectoria inclúe tamén numerosos videoclips).

Sinopse

James Figueras (Claes Bang) é un ambicioso e carismático crítico de arte, seduce a Berenice Hollis (Elizabeth Debicki), unha nova turista americana, tan inocente como provocadora, de viaxe por Europa.

Xuntos chegan á luxosa propiedade que o poderoso coleccionista de arte Cassidy (Mick Jagger) posúe no Lago Como. O anfitrión revélalles que é o mecenas do enigmático artista Jerome Debney (Donald Sutherland) e failles unha extrana proposta: que James roube do estudio do artista unha obra mestra de Debney, custe o que custe.

A medida que a parella pasa tempo co lexendario Debney, comezan a darse conta de que nada sobre o artista nin a súa misión é o que semella. Pero James é tremendamente ambicioso e fará calquera cousa para promover a súa carreira...

A serie “3Camiños” retoma a súa gravación en Pamplona e incorpora á actriz Cecilia Suárez

A serie “3Camiños” reiniciou esta semana a rodaxe tralo parón motivado pola declaración do estado de alarma. A ficción, producida pola socia Ficción Producciones, coa Xunta de Galicia e Beta Films, que emitirá Amazon Prime Video, incorpora no seu reparto a Cecilia Suárez, que se suma a Álex González, Verónica Echegui, Anna Schimrigk, Andrea Bosca e Alberto Jo Lee.

“3Camiños”, serie transmedia e internacional sobre o Camiño de Santiago, comezou a súa gravación o pasado mes de febreiro, pero tivo que interromperse, como o resto de producións, debido á pandemia global.

A serie conta coa dirección de Inaki Mercero e Norberto López Amado como director principal. Protagonizada por Álex González, Verónica Echegui, Anna Schimrigk, Andrea Bosca e Alberto Jo Lee, recorre a vida de cinco amigos de cinco países diferentes conectados polo Camiño de Santiago en tres momentos puntuais das súas vidas. Ademais, Cecilia Suárez súmase ao reparto, para dar vida a Úrsula Méndez, unha muller que experimentará unha conexión inesperada con Roberto (Álex González), a quen coñece a través do seu mellor amigo. Úrsula, un par de anos maior que Roberto, é tímida pero serena, cunha mirada e un sorriso que desprenden a disposición dunha muller paciente e xenerosa.

“É unha serie complicada e ambiciosa”, aseguraba Mamen Quintas, produtora executiva, na presentación da ficción. Tanto é así que narrará a vida de cinco amigos de nacionalidades diferentes conectados polo Camiño en tres momentos puntuais das súas vidas. É dicir, nunha serie que dá saltos no tiempo -ubicarase en 2000, 2006 e 2021-, a rodaxe pasará por diferentes escenarios en comunidades autónomas españolas, como A Rioxa, Castela e León e, como non, Galicia. Pero tamén haberá paisaxes internacionais: as gravacións pasarán por Alemaña Italia, México e Corea do Sur.

 

“Hierro” retoma a rodaxe da súa tempada 2 en xuño

Nos vindeiros días retomarase a gravación da segunda tempada de “Hierro”, a ficción da socia Portocabo, ARTE France e Atlantique Productions para Movistar+ que, xunto ao Goberno de Canarias, acordaron un estricto protocolo sanitario, para o que foi fundamental o apoio do Cabildo de El Hierro e diferentes empresas do arquipélago. “Hierro” convértese así na primeira produción orixinal de Movistar+ que volve á produción tralo parón ocasionado polo estado de alarma decretado a mediados de marzo.

Segundo sinala Movistar+ nun comunicado “o equipo de artistas e técnicos regresará a El Hierro, onde transcorre a serie, escalonadamente”, unha vez se sometan a un test PCR nas súas residencias habituais. Ademais, á súa chegada á illa terán que pasar un período de illamento e un novo test médico antes de reincorporarse aos que serán os seus aloxamentos durante as 10 semanas de gravación que restan.

A plataforma engade que “a volta á rodaje reactivará unha actividade que implica laboralmente a máis de 100 artistas e técnicos así como a un bo número de empresas colaboradoras locais.”

A segunda tempada de “Hierro” estará integrada por 6 episodios de 50 minutos de duración e verase en Movistar+ no ano 2021.

Creada por Pepe Coira e dirixida por Jorge Coira, “Hierro” é un thriller policial, con Candela Peña como protagonista. A serie conta cun amplo reparto no que destacan o actor arxentino Darío Grandinetti, os canarios Kimberley Tell, Tania Santana, Maykol Hernéndez, Ciro Miró, Iris Díaz, Aroa Hafez ou o hispano sueco Matías Varela.

RTVE.es estrea o tráiler de “La isla de las mentiras”, de Paula Cons

Xa está dispoñible o tráiler oficial de “La isla de las mentiras”, a primeira longametraxe de ficción dirixida pola socia Paula Cons, que vén de estrearse na plataforma Cine.ar de Arxentina. Un thriller inspirado no afundimento do buque El Santa Isabel fronte á costa da illa galega de Sálvora en 1921.

A película narra en ton de suspense e intriga a fazaña de tres mulleres que se lanzaron ao mar a salvar náufragos e todas as inesperadas consecuencias que para elas tivo ese feito.

Dirixida por Paula Cons, “La isla de las mentiras” está protagonizada por Nerea Barros, Darío Grandinetti e Aitor Luna e estrearase proximamente en salas de cine da man de Filmax.

O filme está coproducido pola galega Agallas Films, a vasca Historias del Tío Luis e a arxentina Aleph Cine. Conta coa participación de TVG, RTVE e ETB, e co apoio de AGADIC, Goberno Vasco, ICAA, INCAA arxentino, ICA portugués e o Programa Ibermedia.

Sinopse

A madrugada do 2 de xaneiro de 1921, en medio dunha espesa néboa o vapor Santa Isabel, con 260 emigrantes con destino Bos Aires, afundiu fronte á escarpada e dura costa da illa de Sálvora. Esa noite non había homes na illa, estaban celebrando o Nadal en terra firme. A única esperanza dos supervivintes que loitaban por non estrelarse contra as rochas eran as poucas mulleres, vellos e nenos que vivían neste lugar. Tres mozas da illa, María (Nerea Barros), Josefa (Victoria Teijeiro) e Cipriana (Ana Oca), deciden lanzarse ao mar nunha pequena embarcación tradicional. Remando só de oído, debido á espesa néboa e á noite pecha, conseguen salvar a 50 persoas. Todo o que acontece desde esa noite vai sacudir e cambiar para sempre a esta illa. Un xornalista arxentino, León (Darío Grandinetti), acude a Sálvora para cubrir a nova do naufraxio. Pero pouco a pouco comproba que esa noite sucederon demasiadas terribles "casualidades" na illa. Son moitas as incógnitas que hai que resolver...

A CRTVG, a única canle de España con medidas para o audiovisual recollidas polo Observatorio Audiovisual Europeo

O Observatorio Audiovisual Europeo acaba de publicar unha guía na que se recollen 623 medidas de operadores, gobernos e asociacións europeas na defensa do sector audiovisual contra a crise provocada pola COVID-19.  As únicas medidas recollidas polo informe europeo dun teleoperador español son as lanzadas o pasado 8 de abril pola CRTVG para apoiar o sector audiovisual e creativo de Galicia.

A guía pode consultarse aquí, e será actualizada progresivamente polo Observatorio.

Nestas semanas xa foron activadas iniciativas concretas para a adquisición de documentais e a contratación ou o acordo da participación da CRTVG en sete novos proxectos cinematográficos. Esta guía faise pública unha semana despois de que o informe anual da Comisión Nacional dos Mercados e a Competencia (CNMC) certificara que a CRTVG é a canle que máis investiu en contidos audiovisuais -cine e series- de entre todas as televisións autonómicas no ano 2018.

Estas medidas de apoio ao sector son só unha parte do labor desenvolvido polos medios públicos de Galicia no marco da pandemia da COVID-19.  

Máis de 50 horas de retransmisión das autoridades gobernamentais

A CRTVG, cumprindo coa súa misión de servizo público, traslada á cidadanía galega as comparecencias das autoridades gobernamentais e sanitarias, tanto de ámbito estatal como autonómico, para que os galegos e galegas teñan toda a información en directo que emana das fontes oficiais.

A reacción da CRTVG á pandemia da COVID-19 foi aumentar o servizo público, aumentar os servizos informativos, manter os programas de entretemento e reforzar a división dixital; e todo conxugado coa propia protección da saúde dos seus traballadores.

Máximos históricos da Radio Galega e de contidos online

A primeira onda do Estudo Xeral de Medios (EXM) de 2020 recolleu unha das mellores cifras de audiencia da historia da Radio Galega, con 212.000 oíntes de luns a venres. Isto supón un incremento do 60% en relación a hai un ano. Sumados os datos de Radio Galega e Radio Galega Música, esta cifra sobe aos 247.000 oíntes. Segundo o EXM, a emisora pública é a primeira de Galicia en share, cun 28,7%, por diante das radios privadas, e tamén é líder no consumo por minutos, cunha media de 186 minutos por oínte de luns a venres.

O reforzo dos contidos dixitais nestes dous primeiros meses de estado de alarma derivaron en datos de máximo uso do servizo público a través das canles online no mes de abril (datos facilitados polo medidor de referencia Comscore). A web crtvg.gal rexistrou en abril o máximo histórico de número de usuarios, sesións e páxinas vistas, este último dato por riba dos 3 millóns de páxinas; e o número de usuarios únicos das canles da CRTVG aumentou nun 88% desde xaneiro ata abril.

A sección online de “Informativos” acada o máximo histórico de número de páxinas vistas en abril, con case 1 millón, e “Enserie.gal” creceu en abril un 80%. Tamén a canle de Youtube da TVG medrou un 16% con respecto a marzo.

A CRTVG fixo un esforzo tamén en dixital para trasladar á cidadanía información esencial e de servizo público, e elaborou centos de vídeos de menos dun minuto para facer chegar a toda a poboación dunha forma sinxela e rápida todas as ordes, instrucións, normativas e recomendacións que ían emanando tanto desde o Goberno central como o autonómico para que todos os galegos e galegas tiveran acceso a toda a información máis relevante de maneira inmediata e en calquera lugar onde se atopasen.

Jorge Algora, relixido presidente do Clúster Audiovisual Galego

O produtor e socio fundador de Adiviña Producións, Jorge Algora, foi relixido por unanimidade presidente do Clúster Audiovisual Galego para os próximos tres anos na Asemblea Xeral Extraordinaria de socios que celebrou a entidade o venres 15 de maio de maneira telemática. A Asemblea tamén ratificou os membros que integran a nova Xunta Directiva para este novo período. 

O presidente do clúster, en primeiro lugar, agradeceu a confianza depositada nel durante os últimos anos e a colaboración recibida tanto por parte dos membros da Xunta Directiva coma do resto de empresas socias. Do seu primeiro mandato cómpre salientar o notable incremento acadado no número de asociados e o ter conseguido situar de novo ao clúster como organismo de referencia na interlocución entre as empresas e as administracións. 

De cara ao seu segundo mandato, e dadas as circunstancias de especial dificultade polas que atravesa o sector, Jorge Algora manifestou a súa intención de “traballar para que as empresas do Clúster realicen o seu labor nas mellores circunstancias posibles e dispoñan de ferramentas útiles” para afrontar a actual crise derivada da pandemia. Tamén está entre os seus obxectivos “converter ao Clúster no organismo máis efectivo” que coordine a relación das empresas do audiovisual galego coas administracións. 

Ademais, entre os retos a curto e medio prazo está impulsar os contidos dixitais, a través dunha maior interrelación entre contidos e tecnoloxía, e integrar como socios colaboradores a asociacións e colectivos sectoriais co obxectivo de formular propostas conxuntas ante a administración que redunden no beneficio do audiovisual galego. Tamén está nos planes do organismo promover a posta en marcha da Galicia Film Commission, así como a creación do Observatorio do Audiovisual Galego, que facilite datos actualizados da industria, entre outros. 

A Xunta Directiva deseñada por Jorge Algora para este mandato inclúe unha nova vicepresidencia de contidos dixitais e unha nova vogalía para a elaboración do plan de posta en marcha da film commission galega. O equipo directivo está composto por 10 persoas, entre as que hai tres incorporacións novas. Xunto ao presidente Jorge Algora, conforman a directiva tres vicepresidentes: Juan de Dios Serrano, de Agallas Films, que ostenta tamén o cargo de tesoureiro; Miguel Conde, de Congo Producciones, e entra na xunta Manuel Meijide, de Mundos Digitales. O cargo de secretaria e xerente do Clúster seguirá sendo desempeñado por Mar Varela. Continúan como vogais Julio Casal, de Ficción Producciones; Margarita Soilán, de Servizos Audiovisuais da Deputación de Lugo, e Aquilino Abeal, de Aeromedia, e incorpóranse Alberto Domínguez, de CTV, e Óscar González, do Instituto Tecnolóxico de Galicia (ITG). 

Por outra banda, a Asemblea Extraordinaria de socios aprobou tanto as contas de resultados do pasado exercicio como o plan de actuación executado no 2019. Tamén se aprobaron o orzamento e o plan de acción para este 2020, e déronse a coñecer as actividades que o Clúster levará a cabo de aquí a finais de ano en cada un dos seus ámbitos de actuación estratéxicos. 

Composición da nova Xunta Directiva do Clúster Audiovisual Galego: 

Presidente: Jorge Algora (Adiviña Producións)

Vicepresidente responsable de Cine Independente e Documentais, e Tesoureiro: Juan de Dios Serrano (Agallas Films)

Vicepresidente responsable de Estratexias de Comunicación: Miguel Conde (Congo Producciones)

Vicepresidente responsable de Contidos Dixitais: Manuel Meijide (Mundos Digitales)

Secretaria: Mar Varela 

Vogais:

Innovación: Óscar González (Instituto Tecnolóxico de Galicia)

Televisión: Julio Casal (Ficción Producciones)

Formación: Margarita Soilán (Servizos Audiovisuais da Deputación de Lugo)

Servizos á Produción: Aquilino Abeal (Aeromedia)

Internacionalización e Estratexia Film Commission: Alberto Domínguez (CTV)

 

Filmax estreará en cines “Una pastelería en Notting Hill” o vindeiro 17 de xullo

"Una pastelería en Notting Hill" estrearase o vindeiro 17 de xullo da man de Filmax. A película está dirixida por Eliza Schroeder e protagonizada por Celia Imrie (“El exótico Hotel Marigold”; “Bailando la vida”), Shannon Tarbet (“Killing Eve”; “Beast”) e Shelley Conn (“Charlie y la fábrica de chocolate”; “Terra Nova”). Completan o reparto Rupert Penry-Jones (“Vita & Virginia”; “Silk”) e Bill Paterson (“Fleabag”).

"Una pastelería en Notting Hill" é unha película vital que narra a historia de superación de tres mulleres que conseguen vencer as súas diferencias e aliarse para cumplir un soño en común. A pesar de estar unidas pola dor da perda, o film logra transmitir de forma positiva e alegre un relato feel-good que, á postre, se volve unha oda sobre como seguir adiante logo do duelo inesperado.

Sinopse

Decidida a cumprir o soño da súa difunta nai de abrir unha pastelería en Notting Hill, a moza Clarissa pide axuda á mellor amiga da súa nai, Isabella, e á súa excéntrica avoa, Mimi. Estas tres xeracións de mulleres necesitarán superar a dor, as dúbidas e as diferenzas para honrar o recordo da súa amada Sarah mentres se embarcan nunha viaxe para establecer en Londres unha tenda chea de amor, esperanza e coloridos pasteis.

"Una pastelería en Notting Hill" é o debut na dirección dunha longametraxe da súa directora, Eliza Schroeder: “con esta película quería explorar diferentes loitas de mulleres que se aman e sen embargo, lles resulta difícil conectar. Tamén me atraeu facer unha película sobre tres xeracións. Quería retratar que cando as mulleres se unen, podemos superar os obstáculos, facer algo fermoso, fortalecernos e inspirarnos mutuamente.

En segundo lugar, medrar en Alemaña, estar casada cun home francés e vivir o Londres do Brexit, inspiroume para retratar unha cidade culturalmente diversa. Notting Hill, que foi o meu fogar durante 11 anos, se converteuse no telón de fondo da película, xa que sempre me inspirou este vecindario. Finalmente, despois de perder a miña propia nai hai uns anos, quixen tratar a morte dunha maneira digna, sen escurecela e sen restrinxila, senón deixar que traiga esperanza e vida”.